2 Samuel 22

Dawidnê wê daŋgeŋa

1Dawid gêga wê tonec gêdêŋ Apômtau, gêdêŋ bêc, taŋ Apômtau gêjam eŋ sa aŋga nê ŋacjo samob lemeŋ to aŋga Saul lêma naŋ. 2Eŋ kêsôm gebe

“Apômtau kêtu ŋoc lamuanô to ŋoc tuŋtêna
ma ŋoc gêjam-sawaga.
3Aêŋoc Anôtô kêtu ŋoc lôm, taŋ gaê lamu naŋ.
Eŋ kêtu ŋoc lautuc ma ŋoc moasiŋ ŋabulakôp.
Eŋ kêtu ŋoc lêmôp to ŋoc lômlabu ma ŋoc kêsiwaga,
taŋ gêjam aê sa aŋga gêŋ saic-saic naŋ.
4Aê aoc gêjac Apômtau, taŋ talanem eŋ naŋ,
ma eŋ gêjam aê kêsi aŋga ŋoc ŋacjonêŋ.

5“Gebe gêmacanô ŋadembom gênôm aê auc
to gêŋ gebe enseŋ aêŋa ŋasamac kêtakê aê.
6Lamboam ŋalêpoa gêsô aê tôŋ
gêmacanô gêwa lakô aê.
7Gamoa e katuc uŋ tageŋ ma aoc gêjac Apômtau
ma gamôêc gêdêŋ ŋoc Anôtô gebe ênam aê sa.
Eŋ gêŋgôŋ nê gamêŋ dabuŋ ma gêŋô ŋoc môêc
ma gê taŋa aêŋoc taŋiboa, taŋ kataŋ gêdêŋ eŋ naŋ.

8“Go nom wiwic to kôtêŋ-kôtêŋgeŋ, undambê ŋataoŋ kêtênêp e kôjô-kôjôgeŋ
gebe eŋ têtac ŋandaŋ kêsa ŋanô.
9Jadauŋ kêsa eŋ lususuŋ to ja ŋawaô kêsa eŋ awasuŋ
ma ŋalana ŋamôsi kêpêlaŋ aŋga ênê kêsa gêja-gêja.
10Eŋ kêwê undambê sêlilib kêsêp gêmêŋ.
Tao ŋamajaŋ gêc eŋ akaiŋ ŋalabu.
11Eŋ gêlôb gêŋgôŋ kerub ŋaô.
Eŋ gêŋgôŋ mu ŋamagê ŋaô ma gêlôb wip tageŋ.
12Eŋ kêkêŋ gêsuŋbôm kêtu nê becobo.
Kom ŋamajaŋ to tao tokatap-tokatap kêkôm eŋ auc.
13Ŋalana ŋamôsi kêpêlaŋ kêsa
aŋga ŋawasi, taŋ gêmuŋ eŋ naŋ.
“Apômtau kêkêŋ nê wapap gêjac aŋga undambê.
Ma Lôlôc Ŋatau kêkêŋ nê awa kêsa.
15Eŋ kêpê nê sôb ma kêpalip nê ŋacjo êliŋ-êliŋ.
Ôsic kêtakê êsêac sêc gôliŋ-gôliŋgeŋ.
16Gwêc ŋagêdimbob gêôc tau sa kêtu awê
ma nom ŋataoŋ kêwaka tau sa.
Gebe Apômtau gêjam wambaŋ
ma ŋawajaô kêsa eŋ lususuŋ.

17“Eŋ kêmêtôc lêma aŋga lôlôc mêŋkêkam aê tôŋ
ma gê aê sa aŋga ŋasamac kapôêŋ ŋalêlôm.
18Eŋ kêjaŋgo aê su aŋga ŋoc ŋacjo ŋaclai nê
to aŋga ŋoc gobi, taŋ nêŋ ŋaclai kêkôm aê auc naŋ nêŋ.
19Êsêac sebo sêsa dêdêŋ aê gêdêŋ ŋoc bêc ŋawapacŋa,
mago Apômtau kêpuc aê tôŋ.
20Eŋ kêkam aê sa jakakô gamêŋ kwalam.
Eŋ kêsaic aê sa kasa gaja gebe eŋ têtac gêwiŋ aêgac.

21“Apômtau kêmoasiŋ aê kêtôm laŋôcnêm sawaŋa.
Eŋ gêjam aê sa kêtôm lemoc selecŋa.
22Gebe aê kasa Apômtaunê lêŋ ŋapep
ma kakac tauc su aŋga ŋoc Anôtônê ŋaucŋageŋ atom.
23Ênê biŋgêdêŋ samob kêkô aê laŋôcnêm
ma gajam dêmôêc ênê biŋsu atom.
24Aê kasa ŋoc lêŋ ŋapep e eŋ gêlic aê ŋajam.
Ma gajob tauc ŋapep gêdêŋ gêŋ sec.
25Amboac tonaŋ Apômtau kêmoasiŋ aê kêtu gamoa ŋaŋêŋŋa,
kêtu ŋoc ŋalêlôm selec gamoa eŋ laŋônêmŋa.

26“Aôm gôwa taôm sa gêdêŋ ŋac ŋajam gebe aôm ŋac gabêjam,
gêdêŋ ŋac laŋônêm sawaŋa gebe aôm taôm ŋac laŋônêm sawa.
27Aôm gôwa taôm sa gadêŋ ŋac mansaŋ gebe aôm taôm mansaŋ
mago gêdêŋ keso-keso, tec kôtôc taôm amboac kaiŋ teŋ.
28Aôm gôjam lau, taŋ sêkôniŋ tauŋ naŋ sa
ma kôkôniŋ lau, taŋ tetoc tauŋ sa naŋ.
29Biŋŋanô, o Apômtau, aôm kôtu ŋoc ja.
Ŋoc Anôtô kêpô ŋoc ŋakesec ŋawê kêsa.
30Biŋŋanô, aôm embe ôwiŋ aê oc janac lausiŋ popoc
ma ŋoc Anôtô embe êwiŋ aê oc jamboaŋ jaŋgêli nêŋ tuŋbôm.
31Anôtô tonaŋ tec gêjam gôliŋ gêŋ samob tomalageŋ.
Biŋ taŋ Apômtau gêjac mata naŋ, kêtu anô.
Eŋ kêtu lau samob, taŋ sê lamu eŋ naŋ, nêŋ lautuc.

32“Apômtau taugeŋ eŋ Anôtô.
Ma aêacnêŋ Anôtô taugeŋ eŋ lamu ŋanô.
33Anôtô tau tonaŋ kêtu ŋoc lamu ŋajaŋa tau
to kêmasaŋ ŋoc intêna gebe jasa toôlic samucgeŋ.
34Eŋ gêgôm ŋoc ockaiŋ kêtôm mojawa nê.
Eŋ ketoc aê kakô lôc ŋamoatêc ŋaô toôlic samucgeŋ.
35Eŋ kêdôŋ lemoc siŋŋa
tec lemoc jakêkam talam ŋamadi.
36Aôm kôkêŋ lautuc ênam aê kêsiŋa.
Aômnêm moasiŋ ketoc aê sa.
37Aôm kômasaŋ intêna ŋasawa kapôêŋ gebe jasa
ma japô ocgêsu ôkwi atom.
38Aê kajanda ŋoc ŋacjo e gaseŋ êsêac su
ma kakac tauc ôkwi atom e êsêac sêjaŋa.
39Aê gajac êsêac piŋpaŋ ma sebe sêndi e sêgôm jageo.
Ac sêc ockaiŋ ŋalabu.
40Aôm kôjandiŋ aê ŋa ŋaclai gebe janac siŋ ŋanô.
Aôm kôkôniŋ ŋoc ŋacjo sêmoa aê ŋalabu.
41Aôm kôpuc ŋoc ŋacjo sa tec sêc aê
e gaseŋ êsêac samob, taŋ têntac sec gêdêŋ aê naŋ su.
42Êsêac sesom nêŋ gêjam sa teŋ, mago teŋ gajam sa atom.
Êsêac sêmôêc gêdêŋ Apômtau, mago eŋ gêjô êsêac aweŋ atom.
43Aê kalêsa êsêac e têtôm nom ŋakekop.
Aê kaka êsêac tôŋ kêtôm kaka lêsap aŋga intêna.

44“Aôm gôjam aê sa aŋga siŋ tomôkê-tomôkê e kôkêŋ aê katu lausamucnêŋ gôliŋwaga.
Lau taŋ kajala êsêac atom naŋ, sêjam sakiŋ aê.
45Lau jaba sewec dêdêŋ aê.
Aê embe jakac aocsuŋ sa jamoa ma oc taŋeŋ wamu êndêŋ aê.
46Lau jaba latuŋi katuŋ gêjaŋa
ma sêsuŋ tauŋ têtênêp-têtênêpgeŋ sêsa aŋga nêŋ tuŋbôm sêmêŋ.

47“Apômtau gêmoa mata jali. Aê aoc êôc ŋoc lamu.
Aê jatoc ŋoc ŋacmoasiŋ Anôtô sa.
48Anôtô tau tec kêpuc aê tôŋ e kakac ŋoc kamocgôc.
Eŋ kêkôniŋ malac-malac tôŋ sêsô aê ŋalabu.
49Ma eŋ gêjam aê kêsi gêdêŋ ŋoc ŋacjo. Aôm kotoc aê sa kêlêlêc ŋoc soŋo-soŋo,
ma gôjam aê sa aŋga lau ŋaclai nêŋ.

50“O Apômtau, kêtu tonaŋŋa aê gabe jalambiŋ aôm jamoa lausamuc ŋalêlôm
ma janam wê lanemŋa êpi nêm ŋaê.
51Aôm tonaŋ kotoc nêm kiŋ sa ŋanô ma kôtôc nêm têmtac gêwiŋ teŋgeŋŋa gêdêŋ ŋac, taŋ seŋ oso eŋ naŋ,
gêdêŋ Dawid to nê wakuc gedeŋ tôŋgeŋ.”